[Soft Skills面面觀EP1 - 提升Emotional Quotient (EQ)三大妙法]

[Soft Skills面面觀EP1 - 提升EQ三大妙法]小編呢排介紹嘅Externship，好多時都係訓練candidate一啲行業裡面嘅實質技能同埋知識，但係一啲職場上嘅軟技巧，就好似待人處事嘅態度，解決問題能力，人際關係等等呢身為一個fresh grad小薯真係唔係飯飯掂。咁今日就等小編介紹下呢期幾流行嘅情商（Emotional Quotient）啦～提高情商可以話係比起Locker（周圍都係）更多嘅地方都可以應用同埋得益，就好似促進精神健康同埋心情，同時亦都可以改善人際關係。近期亦都要研究發現，提升EQ更加有利於職場上嘅表現，甚至可以幫你升職做幹部，做埋分部長，好幸福啊！專門提供 EQ 測試嘅公司「TalentSmart」做咗一項研究，以軟體「Emotional Intelligence Appraisal」測試咗超過 42000 名受試者嘅 EQ，再同受試者嘅年收入做比較。結果發現高情商嘅人，平均年收入都較高， 其中 EQ 分數每多一分，可以增加年薪1300 美元，是咪好吸引呢！而發起呢個研究嘅臨床心理學和產業組織心理學雙博士學位嘅Travis Bradberry就話：「職場上得到更好待遇的關鍵就是人際關係品質，EQ 愈高的人，就愈容易賺更多錢」。咁入返個正題先，吊咗你咁耐癮，咁即係要點做先可以提升到EQ阿？無有怕，小編私人醒你三招絕學真功夫！第一招：知己知彼增加情商嘅第一步，首先就係要深入了解自己嘅情緒，你有冇試過突然因為一啲情況而搞到自己情緒好混亂，唔知點算好？為咗要提升自我意識，你一定要了解自己遇到乜嘢事情會傷心、開心、嬲嬲豬，可以清楚意識到自己嘅情緒，就可以百戰百勝，進而提升情商，亦都可以從容咁喺職場上同唔同個性嘅人合作！第二招：情緒管理師一個高 EQ 嘅領導可以同情緒共處，唔會喺憤怒嘅情況下倉促決策，亦唔會喺團隊陷入僵局個陣走夾唔抖，更加唔會推卸責任比人叫做姓賴。佢會退後一步，諗下背後失敗嘅原因，而且同返條team解釋，再最後提出解決辦法。而睇緊呢個po嘅你未必咁快就可以做到公司嘅leader，呢個時候嘅你都要管理好自己嘅情緒，做錯就要認，比阿頭話完你嘅時候個種失落應該化成動力去做得更好，而唔係一直頹落去然後做唔到嘢。第三招：豎起耳仔好嘅主管要令下屬覺得自己有價值，關鍵就係在於可以根據自身嘅經驗去比下屬建議。首先就係要認真虛心聆聽員工嘅聲音，唔好擅自落決定，而且要抱住一個「齊上齊落」嘅諗法，做嘢就係一個都不能少，令到一班伙記覺得自己其實都可以貢獻到比公司。而身為啱啱fresh grad嘅小薯仔可能仲喺食物鏈最底層嘅時候，都可以多啲聆聽身邊同事嘅建議，豎起你對耳仔，試下做任何嘢之前都聽下人哋嘅意見，就係練習增加同理心嘅機會。其實高情商除咗令你喺職場有更好表現之外，日常方面亦都可以提高動力完成目標，避免抑鬱症。有更好嘅睡眠質素等等添，你又準備好Master呢種soft skill未呢？