Credit Suisse變Debit Suisse UBS被迫買起佢！？ 啲債券凍過水，仲有乜影響？

Credit Suisse變Debit SuisseUBS被迫買起佢！？啲債券凍過水，仲有乜影響？早兩日我哋先講到Credit Suisse會唔會執笠，一個weekend過去，一間166年歷史嘅銀行就咁俾UBS用32億美元買起咗，十年內由高峰跌到落谷底，被人笑稱「Debit Suisse」。成間投行被人賣盤咁大單嘢，尤其是對於想入finance嘅同學，真係無得你唔知。不過無跟開嘅同學仔唔使太擔心，我哋已經幫你疏理好件事嘅來龍去脈，繼續睇落去了解下啦～前情提要CS近年嚟醜聞不斷，又經歷Archegos爆倉、Greensill破產等危機，已經令佢哋喺舊年年尾流失超過1000億美元嘅資產，要沙地國家銀行注資吊住條命仔。去到最近發表年報，revenue淨蝕80億美元之餘，仲自爆2021年同2022年財報報告程序發現「重大缺陷」（material weakness），令到股價大跌。最後一根稻草係上個禮拜SVB倒閉，成個財金界擔心緊個漣漪效應會唔會影響到CS嘅時候，CS最大股東沙地國家銀行竟然表明唔會再注資。雖然瑞士央行即刻話會借500億瑞士法郎俾CS，但係都無助增加市場對CS嘅信心。UBS咩條件買起CS？瑞士政府威逼利誘？UBS最後以32億美元成功收購CS，但係個過程其實唔係咁順利。CS作為一間「too big to fail」嘅銀行，如果真係摺咗嘅話，一定會引發金融市場大地震，到時其他銀行同金融機構都會受影響，唔係CS執笠咁簡單。為咗唔好俾呢樣嘢發生，喺各方壓力之下，UBS一開始就出價10億美元收購CS。但係CS嫌出價太低拒絕咗，畢竟佢哋嗰陣嘅市值仲有80億美元，接受咁低嘅開價實在對唔住班股東嘅利益。兩行講唔掂數之下，瑞士政府唯有插手，表明如果CS拒絕單deal嘅話，就會「國有化」CS，到時股東利益就真係渣都無。瑞士當局更加破格修改法例，跳過股東投票，擺到明唔俾兩行嘅股東阻擾單deal發生。除咗俾壓力兩行之外，瑞士當局亦都俾咗好多incentive，包括擔保UBS超過90億美元去彌補佢哋嘅損失，同時瑞士央行亦都會向UBS提供超過1000億美元嘅Liquidity。威逼利誘之下，兩行終於傾掂數，UBS以32億美元收購CS。有咩implications？多得UBS嘅收購，可能大家就避過咗另一場「雷曼兄弟」式嘅金融風暴，可以話係暫告一段落。不過咁唔代表市場完全恢復平靜。收購計劃嘅其中一部分就係註銷Credit Suisse所有AT-1債券，涉及超過170億美元。換言之，投資咗喺呢啲債券嘅錢一夜之間就蒸發曬攞唔返。呢個安排惹來市場不滿，因為正常情況下，股東應該要身先士卒承擔所有風險，但係今次啲股東攞得返啲錢，反而債券投資者就一鋪清袋，好唔公平。當然，咁大型嘅收購計劃一定少不了會做架構重組。有傳話UBS同CS合併之後，會裁走近一半CS嘅人，更加會裁埋成個investment banking department。呢個舉動唔單止影響緊喺CS做緊嘅幾萬個員工，亦都俾緊signal其他bank：如果大家情況都唔樂觀嘅話，咁不如大刀闊斧儘早削減自己IBD嘅business（e.g. IPO、market making）。想入finance嘅同學仔就要有心理準備唔同banks都未必會有headcount喇。我哋成日都鼓勵同學留意多啲新聞，除咗因為interview會問到之外，亦都因為世事難料，今日風頭一時無兩嘅公司、行業，可以轉個頭就執包袱，就連166年歷史嘅投行都唔例外。無人知道未來邊一個行業一定最有potential，但係裝備好自己就一定無得輸。Speaking of which，嚟緊下個禮拜二（3月28日）4pm，我哋就邀請咗一位top Hedge Fund Manager Benjamin做一個fireside chat，分享下佢認為同學仔可以點樣喺呢個咁艱難嘅大環境之下嘅recruitment脫穎而出。想聽下recruitment嘅tips，又想知道industry insider點樣睇CS呢件事，就記得把握機會去直接問Benjamin喇。快啲去我哋個bio link register啦～